Бусева кнігарня

Так называецца новая кніга паэта Анатоля Зэкава. Прачытаем разам некаторыя вершы-задачкі, вершы-загадкі нашага аўтара.

Як што?

Адкажыце, хлопчык рускі
І зямляк мой беларус:
Як арбуз па-беларуску
І па-руску – як гарбуз?

Скласці і падзяліць

Пяць бананаў – у Аксаны,
Тры бананы – у Міланы…
Колькі ж будзе ў іх, калі
Скласці тыя ўсе бананы
І пароўну падзяліць?

Ці дагоніць?

Пяць гадочкаў Глебу,
Тры з паловай – Каці.
Колькі год патрэбна,
Каб яго дагнаць ёй?

Малюнак Наталлі Балахонавай

Басаножкі на ножкі

Праз палянку тупаў вожык,
А за ім – чацвёра дзетак.
Колькі трэба басаножак,
Каб абуць малечу летам?