Зебранятка

Зебранятка захварэла,
П’е антыбіётыкі,
А ў суботу не хацела
Абувацца ў боцікі.

Бегла босае па траўцы,
Тупала па лужынах,
А цяпер сядзіць на лаўцы,
Выглядае спуджана.

Пашкадуем Зебранятку,
Пачастуем мёдзікам
І не будзем адмаўляцца
Абувацца ў боцікі!

Купаемся

Лісы ў лазні лапкі мылі,
Спінкі мылі, жываты,
Мылам мылілі, сушылі
І расчэсвалі хвасты.

Лісы мылі лісянят,
Зайкі мылі зайчанят,
Мыем мы сыночку
Носік, вочкі, шчочкі!

Цягнічок

Шпалы-шпалы, рэйкі-рэйкі:
Ехаў цягнічок з Вілейкі,
Вёз ён дзетак у сталіцу
Пагуляць, павесяліцца!

***

Бег сабачка цераз мосцік,
Намачыў у рэчцы хвосцік,
Лёг на бераг адпачыць,
Мокры хвосцік пасушыць.

***

Скок-паскок-паскок-паскок,
Пойдзе хлопчык у лясок,
Набярэ сунічак
І грыбоў-лісічак.

Скок-паскок-паскок-паскок,
Пойдзе хлопчык у садок,
Будзе там смяяцца,
З дзеткамі гуляцца.