Алена КОБЕЦ-ФІЛІМОНАВА

Навагоднія госці

Хутчэй вароты адчыняйце,
Гасцей жаданых сустракайце,
З ласункамі
І падарункамі
Прывезлі нам вялізны воз
Снягурачка і Дзед Мароз.

Вера ВЯРБА

Калыханка

Хоць мароз трашчыць на ганку,
Цёпла ў нашай хаце.
Я спяваю калыханку
Сваёй ляльцы Каці.

Данута БІЧЭЛЬ-ЗАГНЕТАВА

Сані

Дзіва-сані
Сталі самі.
Хто паспеў,
Той і сеў.
І памчалі сані самі
Непраходнымі лясамі,
Па узгорках, па нізінах,
Па заснежаных сцяжынах.

Эдзі АГНЯЦВЕТ

Новы год

Яшчэ вясна адпачывае,
Пад снегам дрэмле крыгаход.
Святло па хвілях прыбывае –
Прыйшоў на працу Новы год.