Прывітанне, паважаная “Вясёлка”! Я вельмі люблю чытаць твае старонкі. Хачу стаць журналістам. Дазволь, я падзялюся з табой сваім хоббі: збіраю і запісваю народныя прыкметы. У мяне ўжо ёсць невялічкая скарбонка апісанняў пра восень. Спадзяюся, калі пашанцуе, мае запісы ўбачаць іншыя чытальнікі на тваіх старонках.

Восень – незвычайная, прыгожая пара года. Рознакаляровыя лісточкі, незвычайнае неба, чароўнае паветра, шалаўлівы ветрык. Прапаноўваю юным чытачам паназіраць за прыродай, а затым параўнаць прыкметы з асабіста ўбачаным.

— Калі на бярозе ліст пачаў жоўкнуць з вяршыні, то будучая вясна будзе ранняй, а калі знізу — то позняй.
—       Увосень птушкі ляцяць нізка — да халоднай зімы, высока — да цёплай.
—       Жоўтае лісце ападае слаба — маразы наступяць не хутка.
—       З’яўленне камароў позняй восенню — да цёплай зімы.
—       Шмат снегу з восені — увесну будзе дажджліва.
—       Калі снег выпадае восенню, а дрэвы яшчэ не скінулі лістоту, ён хутка растане.
—        Чым сушэй і цяплей у верасні, тым пазней зіма наступіць.
—       Доўгая павуціна ляціць – снег прыйдзе не хутка.
—        Шмат павуціны на бабіна лета — да халоднай зімы.
—        Шмат ягад рабіны — да дажджлівай восені і халоднай зімы.
—        Гром у верасні — да цёплай восені.
—       Шмат арэхаў, а грыбоў няма — зіма будзе снежная і суровая.
—        Шмат жалудоў на дубе — да лютай зімы.
—        Восенню расцвілі шыпшыннік, дзьмухавец, гарох на градцы — да доўгай цёплай восені.

Дзякуй за увагу!

Віцебская вобласць, г.Глыбокае
ДУА “Сярэдняя школа № 3 г. Глыбокае”
Вучаніца 8 “А” класа
Любоза Крысціна.