Рыгор БАРАДУЛІН

Едзе вячэра

Пераходзіць
Бусел брод.
Дзюба ўгору ўзведзена –
Гэта едзе бутэрброд
З жабкамі ўсярэдзіне
На вячэру буслянятам.
Добра быць
З цыбатым татам!

Сяргей НОВІК-ПЯЮН

Танцавалі зайчаняткі

Пад наглядам любай маткі
Танцавалі зайчаняткі,
Танцавалі, падпявалі,
Лапкай такты адбівалі.
То яны ўсё бокам, бокам,
І ўпрысядку, і з прыскокам!
Танцавалі ўлева, управа,
Так прыгожа і так жвава.

Ларыса ГЕНІЮШ

Вавёрка

У лісічкі свая норка,
І ў вавёркі ёсць каморка.
Як у добрай гаспадыні,
У вавёркі поўна ў скрыні:
Жалуды, арэхі, шышкі –
Намалюйце іх для кніжкі.

Іван  МУРАВЕЙКА

Парасон

Найдабрэйшы
ён характар мае:
Калі бесперастанку
дождык лье,
Сам да апошняй
ніткі намакае,
Але мне прамокнуць
не дае.