1. Аўчарка

І кемліва, і шпарка
Каманды ўсе як след
Выконвае аўчарка –
Бярэ надзейна след.

2. Бордар-колі

Брытанскі бордар-колі,
Як рыцар, і таму
Не здраджвае ніколі
Гаспадару свайму.

3. Бладхаунд

Бладхаунд мае званне:
Рахманы ратаўнік!
У службе ратавання –
Адданы працаўнік!

4. Бігль

У бігля нюх выдатны –
Няма яму цаны,
Да палявання здатны
Сабака вышукны́.

5. Рэтрывер

Рэтрывер, ласкі поўны,
Цярплівы і сямейны,
І сябар ён цудоўны,
І павадыр надзейны.

6. Даберман

Даберман любы паркан
Пераскочыць, як захоча;
Паслухмяны даберман
Без каманды ўбок не збочыць.

7. Папільён

Каралеўскі папільён –
Гэткае імя далі,
Бо яго яшчэ здавён
Палюбілі каралі!

8. Ратвейлер

У ратвейлера (я ўгледзеў
І скажу, як мае быць) –
Сківіцы, як у мядзведзя…
Бойся гэткага цвяліць!

9. Хаскі

Блакітнавокі хаскі –
Брат воўка і зімы!
Нібы з крыштальнай казкі,
Яго сустрэлі мы.

 10. Такса 

Паляўнічы з кароткімі лапамі –
Такса ўшыецца лёгка ў нару,
Барсука там умомант абдрапае
І аддасць яго гаспадару.

11. Спаніэль

Хапае качку ў возеры
І з ёй плыве на мель,
Нібыта кажа: “Вось і я –
Нястомны спаніэль!”

12. Фокстэр’ер

Фокстэр’ер (ну, што сказаць?) –
Лепш, каб быў на павадку…
Любіць доўга ён гуляць,
Аж натоміць вам руку.

13. Сенбернар

У сенбернара слаўны дар,
І з дарам гэтакім адвеку
Вялізны дужы сенбернар
Дае ратунак чалавеку!

14. Пекінес

Абсыпаны дарамі,
Наш пекінес не дбаў –
З кітайскімі царамі
І Будай сябраваў!

15. Французскі бульдог Хомка

Хомка мой ужо на золку
(З промня першага світання!) –
Просіць “Бусю” і “Вясёлку”
І чытае да змяркання!

Вершы Леаніда Дранько-Майсюка