Казка-забаўлянка

Вырашыў Ваня вучыць В. Выпісаў “Вясёлку”. Вышуквае словы з В.

У кватэры — вазон, ванна, вешалка, вагі, валёнкі, вусаты вуркоцік.

На стале — варэнікі, варэнне, ватрушкі, вінаград, ваза, вермішэль, відэльцы.

У лесе — вольха, вёрткая вавёрка, варона, воўк, ваўчыца, ваўчаняты, вожык, вуж, вужаняты.

Выйшаў Ваня на вуліцу. Валера з вудамі выпраўляецца на возера. Ваня-выдумляка выгуквае:

— Валерык, ты — Алерык.

— Чаму?

— Вывудзі са свайго імя В, і ты — Алерык.

Валера выкрыквае:

— Ведаю, ты не Ваня, а — Аня!

Вясна высвечвае вяснушкі на твары ў Валеры.

Ветлівы ветрык варушыць валасы. Вочы ў выдумшчыка вясёлыя.

Ваня вязе на веласіпедзе Валеру з вудамі, вырульвае да возера. Выганам ідзе выхавацелька, вітаецца.

— Мы В вывучылі,- выхваляюцца Ваня і Валера.

— Выдатна! Вытрымайце выпрабаванне.

— Давайце, вытрымаем!

Выхавацелька вымалёўвае восем В:

-Калі правільныя адказы ўпішаце ў гарызантальныя клетачкі, то па вертыкалі прачытаеце прозвішча вядомага героя вясёлай казкі Васіля Вітка.

Уладзімір ЛІПСКІ