Як незаўважна прамільгнула лета! Верасень прынёс так шмат радасці. Многія мінскія школьнікі завіталі першага верасня ў кінатэатр “Піянер”. Першы ўрок для іх правялі супрацоўнікі рэдакцыі “Вясёлкі”. Мы перадалі  прывітанне ад Васі Вясёлкіна і яго сяброў –  бусліка Бусі і Грошыка. А наш галоўны рэдактар Уладзімір Ліпскі ў гэты дзень быў настаўнікам  у вучняў гімназій і школ горада Брэста. Чытаў свае творы ў межах акцыі “Чытаем разам з velcom”.

Другога верасня рэдакцыя запрасіла да сябе замежных гасцей – пісьменнікаў з Англіі, Дагестана, Таджыкістана, Туркменістана, Чачні. Госці даведаліся, чым жывуць вясёлкаўцы. Мы правялі міжнародную інтэрактыўную сустрэчу-форум “Сябры Вясёлкі”, уручылі ўдзельнікам падарункі ад часопісаў “Вясёлка” і “Буся”.

Трэцяга верасня “Вясёлка” прымала ўдзел у Міжнародным круглым стале літаратараў у Нацыянальнай бібліятэцы. Абмяркоўвалі, як зрабіць кніжкі прывабнымі, цікавымі і  сучаснымі. Вечарам уручылі ўзнагароды юным удзельнікам конкурсу “Жывая класіка” у Рагачове.

Чацвёртага верасня наша краіна адзначала Дзень пісьмен-ства. З усёй Беларусі ў Рагачоў з’ехаліся аматары кнігі. Гэта быў незабыўны дзень! Дэлегацыя ад рэдакцыі “Вясёлкі” і “Бусі” прывезла з сабою скарбонку прыгод і сюрпрызаў: інтэрактыўныя гульні, мультымедыйныя прэзентацыі, мультфільмы, віктарыны па старонках часопісаў; прэзентавалі кніжкі з  серыі “Бібліятэка “Вясёлкі”.

Уладзімір Ліпскі бавіў дзяцей і дарослых аўтарскім чытаннем свайго твора “Як А і Б ігралі на трубе”. Рагачоўскія школьнікі паказалі ў літаратурным спаборніцтве наколькі выдатна ведаюць гісторыю “Вясёлкі”. Насця, Даша, Ксюша, Эліза і Арцём, выхаванцы СШ № 5  г. Рагачова, сталі пераможцамі ў віктарыне, прысвечанай сумеснаму творчаму праекту па асвеце юных фінансістаў і банкіраў  “Школка Грошыка”.

Восень з “Вясёлкай” будзе шчодрай на падарункі, сустрэчы і новыя праекты! “Вясёлка” і  “Буся”, верныя і надзейныя дарадчыкі ў краіне Дзяцін-ства, прапануюць неверагодныя вандроўкі, шмат пачастункаў і літаратурнай смакаты. Сачыце за намі, будзьма разам! www.veselka.by

Радміла КАЗЛЯКЕВІЧ