Леанід ДРАНЬКО–МАЙСЮК

Мышка і кошка

Бегла мышка па дарожцы,
Падарунак несла кошцы –
Не смятану, не аладкі,
А пшанічныя зярняткі.

Кошка ж есці іх не ўмела,
Мышку з’есці захацела,
А пасля паразважала –
З мышкай той пасябравала.

Ніна МАЦЯШ

Далей ад бяды

Буслік, Буслік, ты куды?
Уцякаю ад бяды.
Жабіна малота
Гоніць прэч з балота:
Жабак, можа, з дзвесце –
Хочуць мяне з’есці!
Я ўжо сам не рады,
Што стаптаў ім грады.

Сяргей ПАНІЗНІК

Будзе лад

Калі вазьму сяброў за рукі, –
Няма надзейнейшай зарукі,
Што будзе ў нашай дружбе лад
Для вершаў, песняў і балад!

Валянцін ЛУКША

Званы

– Мы вядомы
З даўніны, –
Раззваніліся
Званы. –
Дружна разам
Як пачнём:
Бом!
Бом!
Бом!
Бом!