Бусел і буслянятка

На буслянцы бусел-татка
Вучыць лётаць буслянятка:
Там, дзе трэба, падпраўляе,
Сына ў неба выпраўляе.

Вавёрка і ваверчаняты

Пад сасной сядзіць вавёрка,
Перад ёю – шышак горка.
Стол гасцінцамі багаты:
Налятай, ваверчаняты!

Коцік

Коцік сам з сабой гуляе,
Ён свой хвосцік даганяе.
Як ні сіліцца, дзівак,
Не дагоніць аніяк!

Пеўнік

Пеўнік зранку запяе –
Следам сонейка ўстае,
Промні-коскі распускае –
Дзень на волю выпускае.