Еўдакія ЛОСЬ

 

Ледзь толькі крануцца падснежныя воды,

Ледзь толькі вярба прывітае вясну,

Раблюся я ворагам крохкай прыроды –

Галінкі ламлю я і ў хату цягну.

 

І не адчуваю, што з крыўдаю нейкай

Глядзяць на мяне, як жывыя, з куткоў

Пупышкі таполі, духмянай і клейкай,

Пушыстыя мордачкі шэрых каткоў.

 

Ядловец з бруснічнікам стаўлю ў гарлачык,

Завальваю клейкімі шышкамі стол

І быццам хмялею, што соладка плача

Бялюткай бярозы падсечаны ствол…

 

*   *   *

Лясная музыка

 

Столькі салаўінай

Музыкі чуваць,

Што пад тую музыку

Можна танцаваць!

 

Можна захапляцца

Цеплынёю рук,

Слухаць дарагога

Сэрца гулкі стук.

 

І забыцца можна

Аб любой бядзе,

Аб слязе, што родзіцца

Невядома дзе…

*   *   *

Шчаслівая, што сэрцам адгукнулася

На кожную праяву хараства,

Ад гора на зямлі не адвярнулася,

Нібы ад ветру – ніцая трава…

Ні пахвальбы, ні гонару ў прызнанні, –

Шчаслівая жыву з гарой турбот…

Даў Бог мне сэрца, сэрцу – хваляванне,

А іншых і не хочацца даброт!

 

*   *   *

Радзіма пачынаецца з двароў,

Дзе журавель тырчыць, нібыта дрэўка.

Радзіма пачынаецца з вятроў,

Што падказалі першую запеўку…

Радзіма пачынаецца з вайны,

Што чвэрць народа некалі скасіла…

Яна – з тае ўсвядомленай цаны,

Што сам дасі лісточку дзівасіла…

Хвалююся – і ведаю чаго:

Хачу, каб помніў суайчыннік кожны:

Радзіма пачынаецца з таго,

Што не набыць, а толькі страціць можна.

 

*   *   *

Сама адданая прыродзе,

каб з ёй дружылі ўсе – хачу.

З травой і лесам, на выгодзе,

я сына размаўляць вучу.

 

– Дзень добры, поле! – гавару я.

– Дзень добры, поле! – крыкне ён.

Ды скажа: – Грыб, цябе знайду я,

падай мне, кажа, лапу, клён!

 

Гавораць нівы, дрэвы, рэкі…

Прыміце ж да сваёй сям’і

яго, маленькага, навекі

хоць падгалоскам, салаўі!

 

*   *   *

Досвіткам дождж нараджаецца,

досвіткам грыб прачынаецца,

пхае ўгару лісцінку

праз пругкую павуцінку…

 

Родзяцца думы дасветныя,

родзяцца словы прыветныя

баравіковаму гаю,

званковаму сіняму краю…

 

Дзякую досвітку з дожджыкам,

з ветлымі пыскамі вожыкам!

Прачнулася таямніца –

грыбніца…