Уладзімір МАЦВЕЕНКА
Загадка-жарт

Ля варот
Чатыры кошкі –
Вунь, катаюцца
Клубком.
Палічы
У кошак ножкі,
А пасля
Падумай трошкі,
Праз якія дзверы
Кошкі
Забягуць хутчэй
У дом?

(У кошак не ножкі, а лапкі. У чатырох кошак – 16 лапак. У дом забягуць праз адчыненыя дзверы.)

Алесь ЕМЯЛЬЯНАЎ-ШЫЛОВІЧ
Пыласос

Я не сівер, не буран,
Не віхура, не ўраган.
Хоць часамі я і выю,
Не пужайцеся, малыя!
Не вішчыце, не пішчыце,
Пра ратунак не крычыце
Вы ні жартам, ні ўсур’ёз,
Я – звычайны пыласос!

Таццяна СУЧКОВА
Смяшынкі

*
Віка ўбачыла сняжынкі і радасна ўсклікнула:
– Ветрык хмарку раскрышыў!

*
Саша заўважыў у кантралёра лісіны каўнер і запытаў у мамы:
– Гэта цёця прычапіла лісу, каб яе зайцы баяліся?

Вікенцій ВЕРАСАЕЎ

*
Сяргейка раніцаю прачнуўся, стаў расказваць маме сон. Блытае, пляце – адразу адчуваецца, што выдумляе. Старэйшая сястрычка Наташа крыкнула з суседняга пакоя:
– Сяргей, ты ўсё хлусіш!
– Ты адкуль ведаеш?
– А я таксама гэты сон бачыла.
– А-а…
Ён засаромлена прыкусіў язык.

*
Іра:
– Як добра хтосьці прыдумаў: улетку цвітуць кветкі, а ўвосень – лісце.

З рускай мовы пераклаў Анатоль КЛЫШКА