Паміж ручаямі і ліўнямі,
Паміж маразамі і спёкамі
Праходзіць граніца дзіўная –
Наіўная, блакітнавокая.

Граніца з пралесак сплецена:
Пралескі пускаць не павінны
Зімовых завей да квецені,
Снегу – да зеляніны.

Ды – хочаш не хочаш – сыходзяцца:
Не лічацца вёсны з граніцаю!
І пахнуць пралескам даводзіцца
Марозам і навальніцамі.

 Янка СІПАКОЎ

Янка СІПАКОЎ (15.01.1936 – 10.03.2011) – беларускі пісьменнік, лаўрэат Дзяржаўнай прэміі Беларусі. У гэтым месяцы спаўняецца 80 гадоў з дня нараджэння славутага земляка.