Чалавеку патрэбна не слава,
А людская увага і ласка,
І сардэчнае шчырае слова,
І вясёлая добрая казка.

Чалавеку патрэбна усмешка
Незнаёмых вачэй і знаёмых,
Каб дажджамі размытая сцежка
Стала лёгкай на кручах і стромах.

Каб сяброў сустракаў клапатлівых
На дарогах, далёкіх ад дому,
І каб сам быў заўсёды шчаслівы,
Калі шчасце прыносіш другому.

Сяргей ГРАХОЎСКІ

Сяргей ГРАХОЎСКІ (25.09.1913 – 11.12.2002) – беларускі пісьменнік. Працаваў у часопісе “Вясёлка” з 1960 па 1973 год. Аўтар кніг для дзяцей “Ад вясны да вясны”, “Сонечная сцежка”, “Агеньчык у акне” і іншых.