Конік

Конік скача па траве.
–Падвязі! – хлапчук заве.
А ён скокнуў на далонь:
– Конік, дружа мой, не конь!

Бусел

На стракатым летнім лузе
Фіззарадку робіць бусел:
Доўгай дзюбаю гайдае –
Ды на жабак паглядае.

Жабкі

Жабкі грэюцца на сонцы,
Быццам плавалі ў зялёнцы,
Бо касцюм зялёны ў жаб
Ад хваста да самых лап.

Вішня

Калі вішня зацвіце –
Голле нібы ў малацэ.
Нават ветрыку карціць
Нешта ў садзе падбяліць.

Страказа

Ціха кружыцца ў палёце
Страказіны самалёцік.
Ах, якая страказа –
Легкакрылая краса!

Уладзімір МАЗГО