Нам з сястрой сказала мама Рая:
“Сонейка купаецца і грае!

З кубка, у якім ляжыць яечка,
Умывайцеся, мае сардэчкі!”

Соль, ваду і маляванкі ў храме
Асвяціла мамка золкім раннем.

– Выбачай, цябе не возьмем, кошка,
Не табе падрыхтавалі кошык!

На Вялічка для бабулі роднай
Мы збіраем кошык Велікодны.

Пасху з тварагу, разынак, маку
Пакладзем ды іншыя прысмакі.

Наладуемся як след, а потым
На аўтобусе паедзем “сотым”…

Бабу Ліду тройчы пацалуем,
Ад яе “Хрыстос уваскрос!” пачуем,

“Уваскрос напраўду!” – ёй адкажам
І ручнік на кошыку развяжам,

Стол накрыем і зацеплім свечку,
Прачытаем “Ойча наш” адвечны…

Будзем з ёю ў біткі мы гуляцца,
Сочывам, вяндлінай разгаўляцца,

Запіваць гарбатай джэм з маліны
І расказваць школьныя навіны,

Слухаць казкі і развучваць песні
Пра Любоў, якая уваскрэсла…

Уладзімір Сіўчыкаў