Адказы на пытанні і заданні Грошыка з № 1:

Першыя выдатнікі “Школкі Грошыка” – Максім Краўцэвіч, вучань 3 “В” класа СШ № 9 г. Кобрын, і Крысціна Барэль, вучаніца 3 класа Дабравольскай школы (Свіслацкі раён).

Максім Краўцэвіч склаў такія словы з літар слова “Грошык”: кошык, Гошык, шок, горш, кыш, горы, шык. І напісаў такое апавяданне:

У бабулі на гары жыў кошык. Дзед сплёў кошык з лазы. Да яго прыехаў у госці ўнучак Гошык. У бабулі і дзядулі кошык жыў з шыкам. Гошык з кошыкам хадзіў у лес па грыбы. У лесе ён сустрэўся з ваўком і атрымаў шок. Гошык часта гуляў на двары і крычаў на курачак: “Кыш, кыш”.

Крысціна Барэль так растлумачыла сэнс прымавак:

Ката ў мяшку не купляюць: трэба ведаць добра тую рэч, якую збіраешся набываць. Грошы камень б’юць: за грошы можна многае купіць, яны шмат у чым дапамагаюць. Лёгка грош пражыць, а як яго нажыць: каб патраціць грошы, вялікага клопату не трэба, а вось каб зарабіць іх, патрэбна працаваць.

Максім і Крысціна ведаюць такія казкі пра казу: “Воўк і сямёра казлянят”, “Каза-манюка”, “Ліса і казёл”, “Каза-дзераза”, “Сястрыца Алёнушка і братка Іванушка”, “Пра казу і барана”, “Смелая каза”, “Каза і дзед”.

Максім мяркуе, што Грошык вырашыў пасябраваць з казой, бо яна дае вельмі карыснае малако, з яе шэрсці можна вязаць рукавіцы і шкарпэткі. А калі гэта ўсё прадаваць, то будуць грошы.

А Крысціна думае, што каза хітрая і разважлівая жывёла, таму Грошык і сябруе з ёй.

Правільна разгадалі выдатнікі “Школкі Грошыка” рэбус. Адказ – Грошык.

Крысціна БАРЭЛЬ

Каза і Грошык

Жыў ды быў на свеце Грошык,

Меў ён грошай поўны кошык.

Неяк ён сустрэў казу,

Якая ў лесе драла лазу.

– Здарова, Каза, як справы твае?

Каза адказала:

– Нічога сабе.

Цяпер жыву ў лесе, прагналі мяне

За тое, што з’ела капустку ўсю, ме-е…

А ты знайшоў шчасце? – спытала Каза.

– Вядома, знайшоў, – ёй адказвае Грошык. –

Цяпер у мяне многа новых сяброў,

І я іх зрабіў больш шчаслівымі трошкі.