Пасля ціхіх перастрэлак
I налётаў штурмавых
На плацдармах абгарэлых
Усё менш і менш жывых.

Пад зямлёй сышліся цені
Неданесеных штыкоў.
Як загад аб наступленні –
Век кароткі ў юнакоў…

Зразумець мы хочам мову
Вешчых траў і светлых дрэў:
Можа, ў іх ёсць тыя словы,
Што сказаць хтось не паспеў.

Аляксей ПЫСІН

Аляксей ПЫСІН (22.03.1920 – 27.08.1981) – беларускі пісьменнік, удзельнік Вялікай Айчыннай вайны. Для дзяцей напісаў кнігі “Матылёчкі-матылі”, “Вясёлка над плёсам”, “Кавылёк”, “Колькі сонцаў!” і іншыя. У гэтым месяцы спаўняецца 95 гадоў з дня нараджэння паэта.