Вярнуўся ён, зімовы вецер,
Зрабіўшы ўсёй зямлі аблёт,
На дрэвах зноў гайдае вецце,
Сняжынкі сыпле зноў на плот.

Як птушка, ён з чужога краю
Сам адшукаў дадому шлях
І белым пухам усцілае
Сцяжынкі нашыя ў палях.

А намяце сумёты снегу –
І ў пушчы недзе ціха спіць,
Каб мы маглі на лыжах бегаць
І бабу снежную ляпіць.

Пятро ПРЫХОДЗЬКА

Пятро ПРЫХОДЗЬКА (25.2.1920 – 30.11.2006) – беларускі пісьменнік, лаўрэат Літаратурнай прэміі імя Аркадзя Куляшова. Для дзяцей напісаў кнігі “Сустрэча з маленствам”, “Каляка-маляка”, “Сцяблінка”, “Сын камунара”.