Ліжа мішка лёд

На лясным азерцы
Ліжа мішка лёд,
Ліжа і злуецца:
Лёд – зусім не мёд.

Быў бы мішка з мёдам,
То б не меў турбот.
А пакуль галодны –
Ліжа мішка лёд.

Леў

Як леў грыву расчасаў,
Дык такі прыгожы стаў,
Што глядзіцца ён цяпер
Як сапраўдны кавалер.

Малпы-цыркачы

Малпы ў цырку на арэлях
Аж да купала ўзляцелі,
Ухапіліся хвастамі –
Як арэлі сталі самі.

Птушкі на рабіне

Дваццаць дзве галіны на рабіне.
Колькі ж птушак на галіны селі,
Як па дзве на кожную галіну
Да рабіны ўранку падляцелі?

Праўда, дваццаць восем з іх не селі –
Да другой рабіны паляцелі.

Гарады з канчаткам Ы

Загадалі на занятках
Першакласнікам загадку,
Каб назвалі гарады,
Што канчаюцца на Ы.

Першай выгукнула Ганна:
– Асіповічы, Пружаны!
– Лельчыцы! – дадаў Барыс.
Хто працягне гэты спіс?

Як выключыць чайнік?

На пліце зачмыхаў чайнік.
Я да чайніка – бягом.
Дзе знайсці ў ім выключальнік,
Каб не чмыхаў на ўвесь дом?

Я шукаю выключальнік,
Ды ніяк вось не знайду.
Трэба ж,
Каб не чмыхаў чайнік,
Выключыць пад ім пліту.

Ад Іны – да Паліны

З Інаю вучылі алфавіт мы,
А яна баіцца літар,
Бо праз нейкую хвіліну
Іна можа быць не Інай.

Л паставіш перад Інай –
І не Іна ўжо, а Ліна.
А як выйдзе А з-за спіны –
Атрымаецца Аліна.

І Аліна не Аліна,
Бо ўжо з П яна – Паліна.
Як дзяўчынак не паблытаць
З дабаўленнем гэтых літар?