ЦІ ДАГОНІЦЬ? 

Пяць гадочкаў Глебу,
Тры з паловай – Каці.
Колькі год патрэбна,
Каб яго дагнаць ёй?

КОЛЬКІ А ў ПТУШАК?

Жораў,
Ластаўка,
Сава.
Падлічы, каб ведаў,
Колькі ў суме літар А
Ёсць у птушак гэтых.

Ну а колькі літар тых
Неўзабаве стане,
Як далучацца да іх
Шпак,
Жаўна
І каня?

МАШЫНА І ШЫНЫ

Чатыры шыны у машыны,
І адна ў ёй – запасная.
А колькі шын вязе машына?
Хто з вас першы адгадае?

КОЛЬКІ ДРЭЎ?

Зачасаўшы ўгору чуб,
Раскашуе ў лесе дуб.
На яго глядзяць зайздросна
Тры асіны, дзве бярозкі,
Пяць алешын, сосен пяць…

Колькі ж дрэў
На дуб глядзяць?

ЗАДАЧКА-ЖАРТ

Загадаў задачку Стас
Браціку свайму Дзяніску:
– Што хаваецца штораз
Паміж Віцебскам і Мінскам?

ШТО ПЕРАШКАДЖАЕ МІКІТУ?

З матэматыкай нібыта
Сябраваць гатоў Мікіта

І рашыць задачу б мог,
Каб даведацца вось толькі,

Колькі будзе сем без трох
І без двух чатыры – колькі.

Анатоль ЗЭКАЎ