Жыхары з нары

Выглядаюць жыхары
Кожны са сваёй нары.

Чорным футрам бліснуў кроцік,
Сонцу паказаў жывоцік.

Прамільгнулі каля сценкі
Мышак шэрыя сукенкі.

Выцінае нізкі гук
У палёце чорны жук.

Мабыць, у цёплую пару
Я сабе зраблю нару.

Яноты

Ў лесе ўсе яноты
Дружна вучаць ноты.

Толькі два яноты
Маюць шмат ляноты.

Ў іх няма турботы
Пра дыезы, ноты.

Збеглі ад работы
На галлё яноты!

Дах і птах

Усіх здзіўляе вольны птах.
Раптам узляцеў на дах,
А затым мільгнуў у акно
Яго бачылі адно.

Выклікае зайздрасць птах ―
Не ўласцівы птаху страх.

Чыжык і брыжык

Просіць ў мамы чыжык:
― Прымацуй мне брыжык!
― Паглядзі, вялікі чыж
Не чапляе сабе брыж.
Ты ― дзіця сваёй прыроды.
Мы не маем гэткай моды.

Спакуса

У пухнаценькага труса
Ёсць вялікая спакуса:
З’есці моркву ці праснак –
Паўстае пытанне так.

Грызці моркву
Ёсць прычына –
Ён баіцца
Бормашыны!

Зай такіх праблем не ведаў –
Ён капустаю абедаў!

Любоў Сівурава