Радзіма 

І знаёмая сцежка да школы,
І далёкага лесу кола,
І чароўная казка,
І матуліна ласка,
І чароўная родная мова,
І сардэчнае першае слова,
І сябры, і суседзі, і хата,
Хлебам-соллю заўсёды багата, –
Усё дорага мне і міла.
Гэта край дарагі – Радзіма!

Хрысціна КРАСОЎСКАЯ,
Мінскі раён, Навапольская СШ.

Вясна 

Пеўнік заспяваў,
Зімку ён прагнаў.
Мішка буры прачынаецца,
З вожыкам вітаецца.
Бягуць ручайкі па палях,
У свой далёкі шлях.
Сонейка прачнулася,
Людзям усміхнулася.

З вулля вылецела пчолка
Паглядзець, ці ёсць дзе зёлка.
Жаўрукі ўжо адгукнуліся,
Галасы дзяцей пачуліся.

Валерыя Каламіец,
г. Барысаў, СШ № 10.

Складана 

Адмовiўся ад спрэчкi.
Складана.
Але я добра зразумеў:
каб быць сумленным i карысным,
патрэбна розум мець.

Косця ШЫНКЕВІЧ,
г. Мінск, гімназія № 19.

Птушаняты

У гняздзечку каля хаты
Вывеліся птушаняты –
Прыгожыя, крыклівыя,
Часам палахлівыя.

А як злосна кот зірне,
Птушка смела дзеўбане:
– Птушанятак не чапай,
Лепей іх аберагай!

Алена ЧУРКІНА,
Мінскі раён, Чурылавіцкая СШ.

Загадка 

Ноччу лятае – матылькоў хапае,
А настане раніца –
Лапкамі ўгару звісае,
Ды не зваліцца!
(Кажан)

Аліса Драмава,
г. Мінск, гімназія № 23.

Рамонак – трон для пчолак 

Рамонак носіць белую пялёсткавую сукенку. Ён рыхтуе пчолкам жоўты трон. Каралева пчолак прылятае ў госці да Рамонка. Яна сядае на трон і п’е нектар з мёдам. Пасля каралева дзякуе за прыём і, задаволеная, ляціць у вулей. Іншыя пчолкі таксама п’юць нектар і мёд з Рамонка. Усцешаныя, лятуць да хаты. Рамонак таксама радасны, што пчолкі былі ў яго на гасцінах. Удзень Рамонак расхінае сваю белую сукенку, а ўначы захінае. Рамонак – найдабрэйшы і найразумнейшы.

Альжбэта МАЛІШЭЎСКАЯ-СПРЫНЧАН,
г. Мінск, дзіцячы сад № 503 “Вясёлка”.