Генадзь БУРАЎКІН 

Мірон і вароны

Хацеў Мірон
Злічыць варон.
Ды лічбаў ведаў менш Мірон,
Чым на двары было варон.

Сеня і семкі 

Выйшаў Сеня ў сені,
Семкі нёс у жмені.
Тут сінічка смела
На плячук прысела
І з далоні ў Сенькі
Паклявала семкі.

Мікола МЯТЛІЦКІ

Галка

Галка голасна гукала:
– Здабыла скрылёчак сала!
З лапы вырвала ў ката.
Сма-ка-та!

Уладзімір МАЗГО

Мыладрама

Сёння ў Мілы
Міладрама:
Яе мылам мые
Мама.

Ну а можа –
Мыладрама,
Калі мыла
Ёсць таксама.

Стала чыстай
Міла:
– Шчыры дзякуй,
Мыла!

Анатоль ЗЭКАЎ

Хто чым займаўся? 

Марына
Гартала
Буквар.
Карабель
Майстраваў
Макар.
А капрызуля Валерка
Капрызнічаў
Над талеркай.