Беларуска 

Беларуска, беларуска,
Па сцяжынцы крочу вузкай
Між азёраў і бароў –
На сустрэчу да сяброў.

Я спяваю людзям песні
Пра любімы родны край,
Што, як птушкі напрадвесні,
Саграваюць небакрай.

Многа кніжак прачытала
І з павагай гавару:
Багдановіч і Купала
Мне адкрылі Беларусь.

Палюбіла назаўсёды
Край жытнёва-трапяткі,
Дзе бярозкі карагоды
Дружна водзяць ля ракі.

Парыжанка ці пружанка?

Расказала Жанна Воўку
Пра замежную вандроўку.

– Можа, станеш, Жанка,
Хутка парыжанкай?..

А дзяўчынка прамаўляе,
Што яна не прамяняе

На Парыж Пружаны,
Дзе радзіма ў Жанны.

– Я, – гаворыць Жанка, –
Назаўжды пружанка!

Першакласнікі 

Не нарадуюцца вучні:
– Атрымалі мы падручнік.

Гэта кніга нашых мар,
Называецца “Буквар”.

І да нас прыйшла пара
Стаць сябрамі “Буквара”.