Праясняецца пагода,
Бо вярнулася вясна.
Ўсё чакаеш, што прырода
Ўстрапянецца ада сна.

І пад птушы крык і гоман,
Даўшы хвалям вольны ход,
Прыпадыме бацька Нёман
На хрыбце магутны лёд.

Зазвіняць жалобна крыгі,
І бурлівая вада
Снег, размоклы ў час адлігі,
Змые з луга без сляда…

Максім БАГДАНОВІЧ

Максім БАГДАНОВІЧ (9.12.1891 – 25.05.1917) – класік беларускай літаратуры. Аўтар зборніка вершаў “Вянок”, паэм “Максім і Магдалена”, “Страцім-лебедзь”, апавяданняў “Музыка”, “Апокрыф” і іншых. Для дзяцей напісаў паэму “Мушка-зелянушка і Камарык – насаты тварык”.