МАСТАЧКА 

У маляванцы Галя
Ляльку фарбавала.
Чаравічкі ёй зняла —
Для іх фарбаў
Не знайшла.

НАВЫПЕРАДКІ 

Толік сябра папярэдзіў:
Іх аўтобус апярэдзіў.
Сталі ціснуць на педалі –
І аўтобус зноў дагналі.

КУХАРКІ 

Трошкі грэчкі, трошкі манкі –
Мы пячэм бліны для Янкі.
Лыжка маміна ў руцэ –
Стол увесь у малацэ.

БОРКА І ЎБОРКА 

Запытала мама Борку:
— А ці браўся ты за ўборку?
Борка маме адказаў:
— І не браўся, і не браў!

ДЗІЎНАЯ ХВАРОБА 

У майго ката Патапа
Ёсць хвароба – драпатапа.
Драпатуе драпатапа
Кожны дзень ката Патапа.

СУК І БАРСУК

Пад суком сядзеў барсук.
Раптам зверху: тук ды тук.
І барсук залез на сук,
Каб пачуць бліжэй той гук.

КАМУ  ШТО

Качка цешыцца вадой.
Свінка любіць сырадой.
А пчала лагодна песціць
Летнім днём мядовы песцік.