Ваш язык і наша мова,
Слоўнік наш і ваш словарь,
У аснове ўсюды – слова,
Найвышэйшы Боскі дар.

Мы завемся – беларусы,
Вас жа – рускімі завуць,
Ды і ў радасці, і ў скрусе
Шлях адзіны ў нас і путь.

Межаў і границ нібыта
І няма ў нас, ды штодзень
Справа – рожь,
А злева – жыта,

Бэз – у нас,
А ў вас – сирень.

“Канюшына – гэта клевер,” –
Паўтараем, як урок.
Наша поўнач
У вас — север,
Наш усход –
Для вас восток.

Утро з ранкам дзень прывецяць.
Поўня ў нас,
Ці ў вас луна,
Разам мы жывём на свеце –
І Зямля на ўсіх адна.

Анатоль ЗЭКАЎ