Белымі сняжынкамі
Уся дарожка ўсеяна.
Была ў полі рэчанька,
Ды не стала. Дзе яна?

Была ў полі елачка,
Пышная, зялёная,
А яе мяцеліца
Замяла шалёная.

Азярцо празрыстае
За сялом свяцілася,
Посцілка бялютная
На яго звалілася.

Тут зіма заснежыла
Брамы і штыкеты,
Кожны куст і дрэва
У белае адзеты.

Ранкам нашу сцежку,
Што да школы сцелецца,
Мы ізноў пратопчам,
Не мяці, мяцеліца!..

 Станіслаў ШУШКЕВІЧ

Станіслаў ШУШКЕВІЧ (19.02.1908 – 1.01.1991) – беларускі пісьменнік, заслужаны работнік культуры Беларусі. Для дзяцей напісаў кнігі”Звярыны баль”, “Лясная калыханка”, “Сарочы церамок”, “Колькі кіпцікаў у кошкі”, “Дванаццаць пасланцоў”, “Барадаты камар”, “Ліса з магнітафонам” і іншыя.