Махаон

Вельмі дзіўны матылёк!
Заўважаецца здалёк.
І які прыгожы ён!
А завецца – махаон.

Крылы доўгія яго
Ўзорам вызначаюцца.
У падлесках між лугоў
Летам сустракаецца.

О, які цудоўны госць!
Дзеці, паглядзіце.
І ніколі прыгажосць
Толькі не губіце.

Майскія жукі

Што за дзіўны чутны гук
Ля бяроз і клёнаў?
Гэта ўецца майскі жук
Між зялёных кронаў.

Над бярозай маладой
За малым пагоркам
Іх лятае цэлы рой
Майскім надвячоркам.

Шумна, радасна звіняць
Гудам несціханым,
А ўначы палягуць спаць
На лісці духмяным.

Чмялі

Між чырвонай канюшыны
Звонкі гуд плыве чмяліны:
Выспеў залаты нектар –
Лета сонечнага дар.

І турботна загулі
Працавітыя чмялі.
Шмат цяпер у іх работы,
Каб напоўніць мёдам соты.

Не патрэбна іх баяцца,
Бо яны заняты працай.
Ды не трэба іх чапаць,
Каб пасля не бедаваць.

Страказа

Каля рэчкі – страказа,
Крылы – быццам біруза.
Над вадой трымціць, лятае,
Хараством сваім здзіўляе.

Узаўецца ўвышыню
І агучыць цішыню,
Ці завісне верталётам
Над крутым вадаваротам.

Так і хочацца сказаць:
Пакатай нас, страказа.
А яшчэ ты раскажы,
Дзе зімою будзеш жыць?

Астраномам быць хачу

Зоркі ў небе я вучу,
Астраномам быць хачу:
Вывучаць каметы,
Адкрываць планеты,
І сузор’і назіраць,
З дзіўным небам сябраваць,
Каб заўсёды на Зямлі
Людзі радасна жылі.

Скорагаворкі 

Коля брату шчыра рад,
Вельмі добры ў Колі брат.

***

Раніцай сястра Людміла
Пра вавёрку верш вучыла.

***

Бандэроль брат Браніслаў
Барысу з Браслава прыслаў.

***

Расцвілі ў бабулі Лёксы
Гладыёлусы і флёксы.