Для каго цукерка? 

На стале стаіць талерка,
А на ёй – адна цукерка.
Ці для мамы? Ці для таты?
Для сястрычкі ці для брата?
Для каго – не зразумеў,
А таму – узяў ды з’еў.

Пагаварылі… 

Дзве дзяўчынкі на прыпынку
Гаманілі без супынку.
І так доўга гаманілі –
Тры трамваі прапусцілі.

Мастак 

Брат мой вырашыў спытаць:
– Што ты любіш?
– Маляваць!
Каб у тое брат паверыў,
Паказаў яму шпалеры.
– Уляціць табе, няйначай!
– За канапай іх не ўбачаць.

У заапарку

Запыталіся ў Захаркі:
– Бачыў што ты ў заапарку?
І пачулі ад малога:
– Заапарк – і больш нічога.