Прывітанне, дарагія сябры! Мяне завуць прафесар Вуаля. Ці памятаеце, як мы з вамі гатавалі шашлык з паветранага шарыка? Сёння я раскажу вам, як можна самастойна зрабіць лававую лямпу.

Для гэтага нам спатрэбяцца:

• Пустая бутэлька;
• Алей;
• Вада;
• Харчовы фарбавальнік;
• Шыпучыя таблеткі.

Крыху больш, чым напалову, запаўняем бутэльку алеем.

У астатнюю частку даліваем ваду.

Дадаем 10 кропель харчовага фарбавальніка.

Закідваем разламаную таблетку-шыпучку (можна выкарыстоўваць шыпучыя вітаміны або аспірын).

Крыху пачакаем… Наша лямпа гатова! Можна радаваць сваіх родных і сяброў.

Прафесар ВУАЛЯ