РЫСЬ

Маскарад вясёлы ў лесе.
Рысь мурлыча: “Я – прынцэса!”
На галіне, як на троне,
ў ледзяной сядзіць кароне.

ЗАЯЦ

Выбег жвавы заяц зранку
на знаёмую палянку,
і даўмеўся ён ледзь-ледзь,
дзе ліса, а дзе мядзведзь!

МЯДЗВЕДЗЬ

Жаху ўсім мядзведзь задаў.
Гляньце, сёння ён – удаў!
Маскаю такой прыкрыўся,
што аж сам у снег зваліўся.

ЛІСА

А ліса каля янота
круціцца: “Мой дарагі,
сёння я ў шыкоўных ботах,
з тварыкам – Бабы-Ягі!”

ВОЎК

Воўк, да гульняў розных строгі,
у лася пазычыў рогі.
І сказаў: “Вось, калі ласка,
паглядзіце, чым не маска?!”