Які сягоння коўзкі снег!
Як лёгка з ветрам дужацца!
Нішто не спыніць санак бег,
Хоць і галовы кружацца.

Няхай сняжынкі ў вочы б’юць
І маразам сярдуецца! –
А санкі
полазам пяюць,
І холаду –
не чуецца.

Імчым з гары,
Ляцім з гары.
З дарогі, гурбы снежныя!
Уся зямля для дзетвары –
У гэты дзень – бязмежная!..

Кастусь  КІРЭЕНКА

Кастусь КІРЭЕНКА (12.12.1918 – 15.9.1988) – беларускі пісьменнік. Для дзяцей напісаў кнігі “Зялёнае рэха”, “Вясна-красна”, “Сум і радасць дзеда Рэпкі” і іншыя.