Музыка Эдуарда ЗАРЫЦКАГА
Словы Анатоля ВЯРЦІНСКАГА

Дзецям, якія ваявалі ў дні Вялікай Айчыннай вайны.

Вы не пытайцеся болей,
Колькі нам зім і лет.
Прыпала на нашу долю
Безліч жахаў і бед.

Вайна – суровая мачыха
Забрала дзяцінства ў нас.
Вайна – суровая мачыха
Нас вырасціла ўраз.

Рукамі, яшчэ дзіцячымі,
Сціскаем вінтовачны ствол.
Вачамі ўжо недзіцячымі
Аглядваемся навакол.

Вайна – суровая мачыха
Сказала нам сталымі быць.
Вайна – суровая мачыха
Сказала нам ворага біць.

Не помнім прыгожыя казкі,
Забылі харошыя сны.
Саромемся матчынай ласкі,
Бо сталі дзецьмі вайны.

Вайна – суровая мачыха
Нас выгадавала ўраз.
Вайна – суровая мачыха
Зрабіла салдатамі нас.