Матылёк

Крылцы
Склаў матылёк.
Быццам
Кветачка здалёк!

Бася падышла, прысела:
Кветка – пырх! – і паляцела.

Божая кароўка 

Божая кароўка,
Паляці на небка!
Там жукоў чародку
Пасвіць каралеўка.

З воблачка сукенка
І з маланкі пуга.
Дожджык, дожджык!
Сцежкай
Уцякаем з лугу!

Белыя вусені 

Ад смятанкі
Ў Басі з Ганкай
Засталіся вусені
Белыя, над вуснамі…

Вой! Хутчэй злізаць іх трэба,
Каб каршун не дзюбнуў з неба.

Коцік песеньку мурлыча

Паглядзі, у коціка
Кіпцюры.
Яго спінка чорная.
Раз, два, тры!

На ім гальштук беленькі:
Ён спявак.
Языком ружовенькім
Чысціць фрак.

Правілы прыстойныя –
Каб ты знаў…
Ён мурлыча песеньку,
Каб ты спаў.