Спеўнік “Вясёлкі”

Вочы дзяцей

Верш Уладзіміра Мазго

Музыка Алега Елісеенкава

Заглядаю часта ім у вочы –

І на сэрцы робіцца лягчэй,

І халодны сум асенняй ночы

Растае ад шчырасці вачэй

Цёплых, незахмараных, дзіцячых,

Быццам у чароўным светлым сне,

Каб даўно забыты міг удачы

Зноў вярнуўся сёння да мяне.

Прыпеў:

О, вочы дзяцей,

Цуда-вочы дзяцей!..

Яны за нябёсы

І росы чысцей.

У вочы дзяцей –

У крыніцы надзей –

Часцей заглядайце,

Любіце часцей!

Можа, вочы кожнага дзіцяці

Чыстыя і светлыя ад слёз?

Нездарма душа баліць у маці

І хвалюе наш дзіцячы лёс.

Вочы, што не зманяць аніколі,

Для мяне аснова ўсіх асноў.

З тых вачэй струменіцца паволі

Светлая і шчырая любоў.

Прыпеў.