На дошцы малюецца вялiкая прыгожая вясёлка. Да яе моцнымi магнiтамi прымацоўваюцца некалькi нумароў часопiса. Настаўнiк звяртае ўвагу на яркiя колеры, добры настрой i гаворыць дзецям, што ў прыродзе вясёлка – з’ява вельмi рэдкая. Але калi дзецi будуць стараннымi вучнямi, уважлiвымi чытачамi, у класе вясёлка можа з’яўляцца значна часцей, таму што ўжо больш за 50 гадоў жыве на свеце цудоўны дзiцячы часопiс «Вясёлка». У iм пiсьменнiкi дораць дзецям свае творы, а мастакi – надзвычай добрыя малюнкi да гэтых
твораў. Потым загадзя падрыхтаваныя вучнi могуць выразна пачытаць вершы, казкi цi апавяданнi. Настаўнiк падводзiць да думкi, што «Вясёлка» яскравая i прыгожая не толькi сваiмi колерамi, але i творамi, якiя жывуць на яе старонках.
Абавязкова трэба выкарыстаць верш Сяргея Грахоўскага «Вясёлка», якi быў надрукаваны ў першым нумары часопiса «Вясёлка» ў красавiку 1957 года.

Сёння ранiцаю лiў
першы дожджык з громам,
праляцелi жураўлi
i над нашым домам.

Сёння з вулля першы раз

Вылецела пчолка,
Апусцiлася да нас
Першая вясёлка.
I прыгожаю дугой
Стала над лясамi.
Колькi колераў у ёй?
Мы палiчым самi.
– Вось аранжавы!
– Чырвоны!
– І блакітны!
– І зялёны!
– Фіялетавы!
– І жоўты…
– Ну а болей
Не знайшоў ты?
Пашукай,
Бо хутка згіне.
– Вось яшчэ знайшоўся сіні.
– Не шукайце больш дарма –
Іншых колераў няма.
Распраўляе крылцы пчолка,
Зелянее збажына.
Загарэлася вясёлка –
Будзе добрая вясна.

На  ўрок  знаёмства  з  «Вясёлкай»  можна  запрасiць  маму  цi  тату (а  можа,  нават  бабулю  цi  дзядулю),  каго–  небудзь  з  вучняў,  якiя прынясуць  з  сабой  некалькi  нумароў  «Вясёлкi»  тых  часоў.  Яны паведамяць  класу,  што    ў  дзяцiнстве  чыталi  «Вясёлку».  А  потым мама  з  сынам  (цi  тата  з  дачкой)  па  ролях  выразна  прачытаюць верш  цi  апавяданне.  Старыя  нумары  часопiса  ў  многiх  сем’ях  яшчэ захоўваюцца. Трэба толькi не паленавацца распытаць пра гэта бацькоў вучняў. А ўяўляеце, якi велiзарны выхаваўчы эфект атрымаецца, калi з «Вясёлкай» дзяцей пазнаёмяць бабуля цi дзядуля кагосьцi з вучняў! У гутарцы, распрацаванай   сумесна з настаўнiкам, бабуля цi дзядуля раскажуць гiсторыю часопiса, разам разгледзяць нумары розных гадоў, паведамяць  пра юбiлейныя  днi  нараджэння  часопiса,  асаблiва, — 50- гадовы юбiлей, якi адзначаўся не так даўно, у 2007 годзе.

На ўрок можа «завiтаць» Вася Вясёлкiн –  вучань старэйшых класаў у нацыянальным беларускiм строi i пазнаёмiць з часопiсам. Ён прачытае на памяць вершы, прапануе адгадаць загадкi. З Васем можа прыйсцi i Васiлiнка. Калi паклапацiцца  загадзя, Вася Вясёлкiн, Васiлiнка  i  iх сябры могуць падарыць малым сапраўднае свята «Вясёлкi».