РЭЖЫМ ДНЯ – ГЭТА НЕ ГУЛЬНЯ.
ЁН ПАТРЭБНЫ ЎСІМ –
І ВЯЛІКІМ, І МАЛЫМ.

Ёсць у кожнага рэжым.
Ёсць у таты ён і ў мамы.
Хоць маленькі я зусім,
Ды сябрую з ім
Таксама.

Каб усё было ў парадку,
Ложак свой я засцялю,
А затым зраблю зарадку
І дрымоту праганю.

Без падказкі,
Без прынукі
Тварык мыю я і рукі.

А яшчэ – няма сакрэту –
Чышчу зубы “Блендаметам”.

І – бяжком на кухню прама,
Дзе гатуе кашу мама.

Кашу есці з бутэрбродам
Раніцай гатоў заўсёды,
Як і з мамаю ў дзетсад
Кожны дзень ісці я рад.

Ды адна бяда, здаецца:
Мама ў ім не застаецца,
Ды й не можа заставацца,
Бо спяшаецца на працу.

Гульні розныя нам ладзіць
Выхавацелька ў дзетсадзе.

Тут, у садзіку сваім,
Мы абедаем і спім.

А пасля чакаем там
Мы пад вечар любых мам.

І ўжо кожнаму вядома:
Цэлы вечар будзем дома
Ля камп’ютара сядзець
Ці то мульцікі глядзець…

Толькі калыханкай зможа
Мама нас загнаць у ложак!

Тэкст Анатоля ЗЭКАВА
Малюнкі Уладзіміра ЖУКА