Прысвячаецца
Васілю ВІТКУ
Музыка Эдуарда ЗАРЫЦКАГА
Словы Міколы МАЛЯЎКІ

Красуюць майскія сады
На Случчыне – яго радзіме.
Чакаюць, прыйдзе ён сюды
І яблыньку сваю абдыме.

Усмешкай радуе здаля,
У цень ад сонца не прысядзе:
Чакаюць дзеда Васіля
У школе і дзіцячым садзе.

Прыпеў:
Ён упрыгожыў гэты свет,
Ён спадарожнік наш жыццёвы –
Настаўнік, казачнік, паэт
І абаронца роднай мовы.

Ідзе сцяжынкай палявой,
З вавёркай гутарыць у гаі.
Над пасівелай галавой
Вясёлка німбам яркім ззяе.

Не сумна з кнігай аднаму,
Для творчай працы веку мала.
Зязюля слуцкая яму
Даўно бяссмерце накувала.

Прыпеў.