Вася Вясёлкін запрашае ў Ізраіль

Ізраіль – параўнальна маладая дзяржава  з вялікай і  старажытнай  гісторыяй. Яна была створана 14 мая 1948 года.  Мяжуе з Ліванам, Сірыяй, Іарданіяй, Егіптам. Плошча краіны – 20,7 тысячы квадратных кіламетраў. Сталіца – Іерусалім. Нацыянальная валюта – шэкель. Дзяржаўныя мовы – іўрыт і арабская, шырока распаўсюджана англійская мова.  У краіне прыдумалі флэшку, антывірусныя і камп’ютарныя праграмы, мабільны тэлефон. Рака Іардан, возера Кінерэт, невялікія рэчкі, а таксама крынічкі і падземныя воды – асноўныя запасы прэснай вады ў краіне.

Іерусалім

Іерусалім, ці Ерушалаім, – гэта горад міру.  Старажытная сталіца цара Давіда на вяршыні гары аднолькава свяшчэнная для трох рэлігій. З якога боку вы не набліжаліся б да горада, будзеце  ісці дарогай паломнікаў: веруючыя людзі ходзяць гэтым шляхам не адну тысячу гадоў. Іерусалім – горад кантрастаў. Тут муры Старога Горада і гандлёвыя цэнтры Новага Горада, аркі часоў Рымскай імперыі і Равы часоў Візантыі. Святыні  для яўрэяў, хрысціян і масульман – Сцяна плачу,  Храм гроба Гасподня і залаты купал мячэці Скалы на Храмавай гары, мноства цэркваў, пабудаваных там, дзе праходзіў Ісус Хрыстос.  А яшчэ ёсць Храм кнігі, у якім знаходзяцца пергаментныя скруткі Мёртвага мора –  са старажытнымі тэкстамі, якім больш за 2000 гадоў. Маляўнічыя вітражы  Марка Шагала ўпрыгожваюць медыцынскі цэнтр “Хадаса”. Усім гэтым уражвае і прываблівае Іерусалім.

Рош-а-Шана

Рош-а-Шана перакладаецца як “галава года”, што азначае  іудзейскі Новы год. Адзначаецца ён на працягу двух дзён.Святкаваць пачынаюць пасля заходу сонца.  Усе стравы, якімі частуюцца ў гэтыя дні, маюць свае сімвалы. Перад пачаткам вячэры прынята есці рыбныя галовы. Пры гэтым гавораць: “Воля Твая… каб мы былі ў главе, а не ў хвасце”. Чытаюць малітвы, трубяць у шофар –  бараноў рог.  Яго гукі павінны дапамагчы  ў  пакаянні. Сёлета свята адзначаецца 28 і 29 верасня, па яўрэйскім календары гэта будзе 5772 год.

Мёртвае мора

Мёртвае мора, якое яшчэ называюць Салёным, атрымала сваю назву таму, што  ў яго водах – з-за вялікай  канцэнтрацыі солей і мінеральных рэчываў – амаль адсутнічаюць жывыя арганізмы.  Нават той, хто не ўмее плаваць, лёгка ўтрымліваецца на паверхні вады.  Мёртвае мора – самае нізкае месца на планеце: яно на 412 метраў ніжэйшае за ўзровень сусветнага акіяна. Даўжыня мора – 74 кіламетры, шырыня – 17 кіламетраў, найбольшая глыбіня – 400 метраў. З даўніх часоў нашы продкі ведалі і пра лекавыя ўласцівасці вады Мёртвага мора.

Ір млахім

Ір млахім, у перакладзе з іўрыта – горад Каралёў. У Парку забаўлянак увасоблены сюжэты з вялікай кнігі Танах – Ветхага запавету. Падчас вандроўкі ў мінулае вас запросяць у пячору даўжынёй 360 метраў. Але перад гэтым трэба спусціцца на глыбіню 60 метраў на ліфце. Горад Каралёў знаходзіцца на самым захадзе Ізраіля – у Эйлаце. Эйлат – горад-порт на беразе Чырвонага  мора. У ім створаны Музей рыб.

Анастасія РАДЗІКЕВІЧ