Малочны туман

Вербалозы і ракіты

Зелянеюць над вадой.

У нізках туман разліты –

Белы, быццам сырадой.

Малако туманных раніц

Сонца п’е каля ракі,

І таму ў яго румянец

Не сыходзіць са шчакі.

Страказа

Ля ракі крушына і лаза.

З лісціка ўзляцела страказа.

Крыльцамі трапеча і гудзе –

Толькі цень бліскучы на вадзе.

Так і кружыць цёплай раніцой

Самалёцік сіні над ракой.

Месяц

Месяц коціцца за хату.

Тут Алёнка кажа тату:

– Прывязаць яго нам трэба,

Каб не ўпаў ён часам з неба.

Віктар Гардзей

У гэтым месяцы пісьменнікам Віктару Гардзею і Алесю Марціновічу спаўняецца 65 гадоў. Віншуем юбіляраў – даўніх аўтараў і сяброў “Вясёлкі”! Жадаем здароўя, творчага плёну.