Алесь Бачыла

Радзіма мая дарагая,

Ты ў шчасці жаданым жыві:

Я сэрцам табе прысягаю

У шчырай сыноўняй любві.

Я радасць сваю не стрымаю –

І песня ўзлятае сама:

Мне лепей ад роднага краю

Нічога на свеце няма.

Чужое зямлі нам не трэба,

Пачуцці ва ўсіх нас адны:

Мы хочам, каб мірнае неба

Не знала пажараў вайны.

Мы дружбы народам жадаем

І шчырай братэрскай любві.

Радзіма мая дарагая,

Красуйся і ў шчасці жыві!