Мастак, мой зямляк,
Ты малюеш пэндзлем заморскім,
Як і творцы старыя раней.
Няхай Багародзіца – белатварая,
Ты намалюй мне анёлачкаў чарнаскурых.

Няўжо няма жывапісца,
Які намаляваў бы анёлачкаў,
Падобных на дзяцей з майго сяла,
З усімі рысамі майго народа:
З яго анёламі белымі,
З яго анёламі смуглымі,
З яго анёламі чарнаскурымі,
Якія смакуюць манга,
Гуляючы па нябесных вуліцах?..

Мастак, мой зямляк,
Калі будзеш маляваць у небе анёлачкаў,
Успомні пра свой народ –
І побач з анёламі іншымі,
Хоць Багародзіца і белатварая,
Намалюй мне анёлачкаў чарнаскурых.

Андрэс Элой Бланка
Пераклаў Мікола Маляўка