Кожны пісьменнік марыць стварыць такога героя, якога б палюбіў чытач. У Васіля Віткі такі герой быў. Гэта шчыры, непасрэдны, цікаўны і дапытлівы Вася Вясёлкін. Зараз Вася Вясёлкін з’яўляецца вядомым талісманам часопіса “Вясёлка”. Разам з вамі, любімымі чытачамі, ён знаёміцца з новай беларускай літаратурай і ўзгадвае класікаў, вучыць новыя беларускія словы і разгадвае сканворды і рэбусы. Вася — верны і любімы сябар дзяцей ужо 60 гадоў.

Васіль ВІТКА

Азбука Васі Вясёлкіна

— Буквар мы пачынаем з А,

І я заўважыць мушу:

Не вельмі цяміць галава,

Хоць і даўгія вушы.

Хапае слоў, апроч асла,

Што пачынаюцца на А:

Арол, акварыум, алень,

Аса, акула, авадзень,

Авёс, алмаз, атара,

Алена і Алеся

І нават акуляры,

Што ты на нос павесіў.

Як закрычыць асёл: — Браткі,

Вось для чаго мне агуркі!

Ў мяне іх — цэлая гара.

За розум брацца мне пара.

Як з’ем апошні агурок —

Урок засвою назубок.

10 год таму ў Васі з’явіўся сябар — буслік Буся. Яго стварылі Уладзімір Ліпскі і Раіса Баравікова. Пазнаёміцца з ім можна не толькі на старонках кніжкі “Бусева школа казкі”, але і ў часопісе для самых маленькіх “Буся”. Вялікая колькасць дзяцей ужо пасябравала з Бусем. Калі ў вас, шаноўныя чытачы, ёсць маленькія брацікі ці сястрычкі, пазнаёмце іх з вясёлым і цікаўным буслянём, якое жыве на старонках “Бусі”.