Мікола ЧАРНЯЎСКІ

Зімовы баль

Здзівіўшы бялюткай абновай,

Зіма-чараўніца прыйшла…

Парошаю-пухам дубровы,

Лясы ўсе, палі замяла.

Зірнула наўсцяж раніцою —

Ні сцежак, ні жоўтай травы…

“Кудою, прывабнай такою

Паеду на баль снегавы?

Дамоўлюся, можа, з бярозкай?..

Бярозка, аддай грабянец.

Каб я з самай дзіўнай прычоскай

Прыйшла, як у храм, пад вянец!”

Сказала бярозка: “За тое,

Што холад прынесла ты нам,

Свайго грабянца нізашто я

У рукі твае не аддам!..”

Узвыла зіма, завіруха

Прабегла па чыстых палях,

Сукенку аздобіла пухам

У срэбна-зіхоткіх агнях…

Каб зімцы аддзячыць, суцешыць

На свяце мяцеліц-гасцей,

Ёй белыя косы расчэшуць

І лыжы, і санкі дзяцей.

Мікола Чарняўскі (16.01.1943) — беларускі пісьменнік, заслужаны дзеяч культуры Рэспублікі Беларусь. Лаўрэат прэміі Янкі Маўра. Аўтар вялікай колькасці кніг для дзяцей.