БРАСЛАЎСКІЯ АЗЁРЫ

Музыка Эдуарда ЗАРЫЦКАГА
Словы Уладзіміра МАЗГО

Забыліся аб зморы
Аматары прыгод —
Браслаўскія азёры
Паклікалі ў паход.

Купанне і рыбалка —
Няма лацвей нідзе.
Тут сонца, як русалка,
Гайдаецца ў вадзе.

Туману сохнуць сеці
На дрогкім хмызняку,
Дзе гушкаецца вецер,
Нібыта ў гамаку.

Не трэба поезд скоры
І хуткі самалёт —
Браслаўскія азёры
Паклікалі ў паход.