Падарылі мне шчаня,

Баўлю час я з ім штодня.

Мой шчанюк такі харошы,

Добры, ласкавы, прыгожы!

 

З чорнай плямкай на спіне,

З рыжанькай — на галаве.

Як мядзведзь — такі калматы,

А яшчэ як кот — вусаты.

 

Поўсць блішчыць, нібыта шоўк,

А злуецца, як той воўк.

З пышнай грывай галава,

І падобны ён на льва.

 

Зубкі вострыя растуць —

Дакрануцца не даюць.

А як гаўкне — ўсе дрыжаць

І спрабуюць уцякаць.

 

Драпаюць абы куды —

Каб далей як ад бяды!

То дарослыя баяцца,

Дзеткам нечага пужацца.

 

Толькі з імі ён гуляе,

На парозе сустракае,

Тыцкае ў далоні нос,

Радасна ўзнімае хвост.

 

Любіць лапку падаваць,

Па падлозе мяч катаць.

Самы лепшы сябар мой —

Ён цяпер заўжды са мной.