БЕГЛА ВОСЕНЬ ПРАЗ СЯЛО…

Зранку дожджык пырскнуў трошкі,
Потым сонейка ўзышло.
З парасонам ды ў галёшах
Бегла восень праз сяло.
Несла кошык каляровы,
І чароўны, у якім
Шмат пяшчотных было словаў
І дарослым, і малым.
А яшчэ капуста, морква,
Памідоры, агуркі,
Буракі і рэдзька горкая,
Гарбузы ды кабачкі.
Прыгажуня, гаспадынька –
Ні прыбавіць, ні адняць.
З хуткім ветрам у абдымку
Будзе танчыць і спяваць.