Рыгор БАРАДУЛІН

Пільная просьба

На тэлестудыю цяля

Прыбегла з просьбай пільнай,

Каб выпусцілі ўрэшце для

Цялятак

ЦЯЛЯфільмы.

 

 

Басалапкі

У адным жывуць двары

Тры Рыжулі,

Тры сястры.

Неяк раз

Абулі кошкі

Басалапкі –

Басаножкі,

Бо за ножкі,

Бо за лапкі

Можа ўцяць

Барбос з-за лаўкі.

Тут жа муркнулі

Рыжулі,

Тэпці мулкія

Разулі –

Басанож

Яно ж

Цішэй

Падкрадацца да мышэй!

 

 

 

 

 

 

 

 

Як быць?

Колькі будзе

Пяць на пяць?

Слон не можа ўцяміць.

Значыць,

Трэба завязаць

Вузялок на памяць.

I не доўга думаў слон,

Завязаў хобат.

Раніцой прачнуўся ён –

Мае новы клопат.

П’юць ваду

Вярблюд,

Індык.

Слон у перапудзе:

Як развяжа хобат,

Дык

Множанне забудзе.

Хто параду можа даць?

Млосна ад развагі:

Лепей ведаць

Пяць на пяць

Ці канаць

Ад смагі?!